Tane Konsumidor

(+670) 3310938
cac@tanekonsumidor.tl

TANE iha rádiu TOKODEPE: seguransa alimentar iha TIMOR LESTE

Hanesan iha protokolu entre rádiu Komunidade ho TANE, ba kada semana rua TANE sei realiza programa radiofónika iha Rádiu Komunidade TOKODEDE. Ho nune’e, iha loron 25.07.2020, reprezentante hosi TANE , Koordenadór-lokál, Antonio da Silva, Juvêncio Amaral hanesan Jurista no Rosalino Soares hanesan asesór ba imprensa nian, sira partisipa iha Talkshow, iha Rádiu TOKODEDE. Tema ba dala-ida ne’e maka “Seguransa Alimentár”, ne’ebé importante tebes, tamba liga kedas ba konsumu, tamba Timor-Leste hanesan nasaun ida ne’ebé dependente ba importasaun. Realidade ida ne’e ezije kontrolu ida ne’ebé efikaz liu-husi instituisaun sira hotu ne’ebé relevante atu garante seguransa iha konsumu ba timoroan tamak. TANE defende aposta iha hasa’e produsaun aihan nasionál.

Iha okaziaun ne’e António Ramos destaka ba importánsia ba iha investimentu públiku iha setór agrikultura nian, atu hatun dependénsia iha importasaun ba produto aihan sira iha Timor-Leste, nia rekoñese investimentu hosi Governu iha setór ida ne’e, maibé, nia hatutan katak seidauk iha sustentabilidade no efikásia iha investimentu. Nia fo ezemplu, hanesan baragen sira ne’ebé konstroi ba irigasaun ba natár sira iha munisípiu Ainaru, Suai ho Viqueque.

Enkuantu iha sorin seluk, Jurista TANE nian, Juvêncio Amaral resalta liutan katak, Seguransa alimentár tama iha Direitu Umanu sira ba aihan, defende katak seguransa aihan ligadu los ho pobreza, nia mensiona medida sira ne’ebé Governu tau iha Planu Estratéjiku Dezenvolvimentu Nasionál (2011-2030) ho Objetivu do Dezenvolvimentu Sustentável.

Iha nia vez, Rosalino Soares salienta “seguransa ba aihan katak garante ba konsumidór sira hotu katak sasan sira seguru ba konsumu, refere ba faze sira hotu ka prosesu tomak hahú husi produsaun to’o ba konsumu, sei la tau ba kauza ba saude konsumidór sira nian.

Relasaun entre seguransa aihan ho ki’ak ho tan mal-nutrisaun ligadu tebes, defende husi tekniku sira na’in-tolu hosi TANE. Sira salienta katak asesu ba produtu aihan sira ho seguransa depende tebes husi rendimentu kada membru família nian, nune konsumidor sira ne’ebé moris iha ki’ak rabat-rai, nia membru sira hetan probabilidade boot liu atu sofre mal-nutrisaun liuliu labarik sira. Sira ko’alia mos konabá zero hamlaha (zero fome) husi Objetivu Dezenvolvimentu Sustentável no Planu Estrateziku Dezenvolvimentu (PED) husi Estadu Timor nian.