Iha loron 5 fulan Juñu, TANE asina ninia protokolu kolaborasaun ba dahuluk ho radiu ida ne’ebé nia sede iha Dili laran- maka: Rádio Comunidade de Comoro, asina husi jestór Radiu nian, Sr. Natalino F. Ximenes, ho Prezidente Diresaun TANE Konsumidor nian, António da Silva Ramos.
Akordu ida ne’e fó-biban ba TANE atu kumpri nia misaun ba informa, hakbiit no sensibiliza konsumidór timór-ona sira konabá sira nia direitu no sira nia obrigasaun sira iha relasaun konsumu nian. Espasu ida ne importante tebes hodi esplika direitu sira no mos bele motiva konsumidór sira atu ejize no reklama atu nune’e konsumidór sira hetan sira nia direitu husi komersiante ka fa’an-na’in sira.
TANE sei halo gravasaun kinzenál ba programa oinoin hanesan : Talkshow, PSA, Radiu Drama, Vox Pop (Komunidade sira nia lian) no Perfil. Parseria ida ne’e importante tebes hodi habelar programa ne’e liu-husi Livestreaming, iha ne’ebé multiplika poténsia rona-na’in (ouvistes) sira nian ne’ebé TANE sei to’o ba.
Objectivo TANE ninian maka atu to´o ba konsumidór sira iha Dili laran ho aredór sira, atu hetan informasaun konabá sira nia direitu ho dever sira, hodi nune’e bele hatene liu wainhira desidi no hola sasan ho servisu sira. TANE hakarak mos hatudu katak vale duni halo reklamasaun, no TANE prontu atu ajuda atu rezolve konsumidór sira nia problema ho dúvida sira iha konsumu.
Hanesan ita hotu-hotu hatene atividade ekonómika iha Timor-Leste konsentra boot liu iha Dilli, nune’e, sevisu hamutuk ida ne’e importante tebes ba TANE hodi hakbesik-an ba Konsumidór sira, hatene liu sira nia realidade hodi nune’e bele fó resposta ne’ebé di’ak liu.
Atu destaka katak protokolu ida ne’e hanesan ba dar’uak nian maka TANE halo ho radiu komunidade sira. Dahuluk maka selebra ho Rádio Comunidade Tokodede.